شہر دہشت زدہ
خواب وحشت زدہ
لوگ خلوت نشیں
قریۂ دام میں
سرخ پھولوں کا رَم
خون کی سیج پر
سبز آنکھوں کا نم
توڑ کر آئنہ
کون چیخے یہاں
کس میں اتنا ہے دم
خار آلودگاں
کیا مکاں کیا دکاں
زنگ ہوتی ہوئی
لوحِ آزردگاں
فہم سے بالاتر ہیں
زمین آسماں
روز بنتا ہے اک
شہرِ آئندگاں
الاماں الاماں
سرخ آنکھوں کا نور
آئنوں کا فتور
اس خرابے میں کیا
فہمِ نزدیک و دور
اور پیروں میں لرزاں ہے
زنجیرِ خاک
آیئے آئیے
نکتہ داں دیکھیے
ہم مجسم لہو
ہم مجسم شکست
آئیے دیکھیے
کون آئے یہاں
شہر دہشت زدہ
خواب وحشت زدہ
لوگ خلوت نشیں